فیلڈ مارشل عاصم منیر کا قومی علماء کانفرنس سے خطاب، ریاست اور سلامتی پر واضح مؤقف

چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر نے 10 دسمبر 2025 کو اسلام آباد میں منعقدہ قومی علماء و مشائخ کانفرنس سے اہم خطاب کیا، جس میں ملک بھر سے تمام مکاتبِ فکر کے علماء اور مشائخ نے شرکت کی۔
فیلڈ مارشل نے دہشتگردی، قومی سلامتی، عالمی سطح پر پاکستان کے ابھرتے کردار، جنگی تیاریوں اور علم کی اہمیت پر مفصل گفتگو کی۔ انہوں نے قرآن کریم کی آیات اور اشعار کے حوالوں سے پاکستان کے نظریاتی تشخص کو اجاگر کیا اور کہا کہ ریاستِ طیبہ اور ریاستِ پاکستان میں گہری مماثلت ہے، دونوں کا قیام کلمۂ طیبہ کی بنیاد پر رمضان المبارک میں ہوا۔
فیلڈ مارشل نے کہا کہ اللہ تعالیٰ نے پاکستان کو محافظینِ حرمین کا شرف عطا کیا، آپریشن بنیان المرصوص میں اللہ کی مدد کو محسوس کیا گیا، جبکہ کسی بھی اسلامی ریاست میں جہاد کا اعلان صرف ریاست کا اختیار ہے۔
انہوں نے افغان طالبان کی پشت پناہی سے ہونے والی دہشتگردی پر تشویش کا اظہار کرتے ہوئے کہا کہ فتنہ الخوارج کی بڑی تعداد افغانستان سے آ رہی ہے، اور افغانستان کو پاکستان اور فتنہ الخوارج میں سے ایک کا انتخاب کرنا ہوگا۔ فیلڈ مارشل نے زور دیا کہ جن قوموں نے علم اور قلم کی طاقت کو ترک کیا، وہ زوال کا شکار ہو گئیں۔