فیلڈ مارشل کی جنگی لباس میں سعودی ولی عہد سے ملاقات غیر معمولی اہمیت کی حامل قرار

اسلام آباد میں دفاعی و سفارتی حلقے فیلڈ مارشل سید عاصم منیر کی سعودی ولی عہد محمد بن سلمان سے حالیہ ملاقات کو غیر معمولی قرار دے رہے ہیں۔ وزیر اعظم شہباز شریف کے ہمراہ ہونے والی اس ملاقات میں آرمی چیف و چیف آف ڈیفنس فورسز کا روایتی باضابطہ (Ceremonial) لباس کے بجائے جنگی لباس (Combat Dress) زیب تن کرنا عالمی سطح پر توجہ کا مرکز بن گیا ہے۔

ماہرین کے مطابق، بیرون ملک دوروں پر عسکری قیادت عموماً رسمی لباس پہنتی ہے، تاہم سعودی عرب جیسے اہم تزویراتی شراکت دار کے ساتھ ملاقات میں جنگی لباس کا انتخاب دونوں ممالک کے درمیان گہرے دفاعی تعلقات اور مکمل یکجہتی کا واضح پیغام ہے۔ یہ اقدام اس عزم کی عکاسی کرتا ہے کہ پاکستان اپنے برادر ملک سعودی عرب کے دفاع اور سلامتی کے لیے ہر لمحہ تیار ہے اور موجودہ دفاعی معاہدوں کے تحت کسی بھی چیلنج کی صورت میں اپنے دیرینہ دوست کے ساتھ کھڑا رہے گا۔