فیلڈ مارشل کی ایرانی قیادت سے تعمیری ملاقاتیں، کشیدگی میں کمی پر غور

خطے میں امن و سلامتی کے فروغ اور تنازعات کے پرامن حل کے لیے پاکستان کی سفارتی کوششیں جاری ہیں، جس کے تحت چیف آف ڈیفنس فورسز فیلڈ مارشل سید عاصم منیر اور وزیرِ داخلہ محسن نقوی کا ایک روزہ اہم دورۂ ایران مکمل ہو گیا ہے۔ پاک فوج کے شعبہ تعلقاتِ عامہ (آئی ایس پی آر) کے مطابق دورے کے دوران فیلڈ مارشل نے ایرانی صدر مسعود پزشکیان، پارلیمنٹ کے اسپیکر باقر قالیباف، وزیرِ خارجہ، وزیرِ داخلہ سکندر مومنی اور سپریم نیشنل سکیورٹی کونسل میں رہبرِ اعلیٰ کے نمائندے محسن رضائی سمیت اعلیٰ ایرانی قیادت سے تفصیلی ملاقاتیں کیں۔ ان اجلاسوں میں علاقائی کشیدگی کے خاتمے، آبنائے ہرمز کو دوبارہ کھولنے اور تنازع کے پرامن حل کے اقدامات پر جامع تبادلہ خیال کیا گیا۔ ایرانی قیادت نے خطے میں امن کے قیام اور مذاکرات میں سہولت کاری کے لیے پاکستان کے تعمیری اور مخلصانہ کردار کی تعریف کی۔