12 نوجوانوں کے ایران میں لاپتہ ہونے کا معاملہ، ایف آئی اے کی تحقیقات شروع

اٹلی بھجوانے کے نام پر 12 پاکستانی نوجوانوں کے مبینہ طور پر لاپتہ اور اغوا ہونے کے ہولناک انکشاف کے بعد وفاقی تحقیقاتی ادارے (ایف آئی اے) کے انسدادِ انسانی سمگلنگ سرکل لاہور نے باقاعدہ تحقیقات کا آغاز کر دیا ہے۔ ایف آئی اے حکام کے مطابق اس سنگین واقعے میں ملوث انسانی سمگلروں کے خلاف تین الگ الگ مقدمات (مقدمہ نمبر 672/26، 673/26 اور 674/26) درج کر لیے گئے ہیں، جن میں انسانی سمگلنگ اور اغوا سمیت دیگر سنگین دفعات شامل کی گئی ہیں۔ ملزمان کی گرفتاری کے لیے خصوصی ٹیمیں تشکیل دے کر مختلف مقامات پر چھاپے مارے جا رہے ہیں، جبکہ لاپتہ نوجوانوں کی بازیابی کے لیے بیرون ملک متعلقہ اداروں سے بھی رابطے کیے جا رہے ہیں تاکہ ان کا سراغ لگایا جا سکے۔

واضح رہے کہ غیر قانونی طریقے (ڈنکی) سے اٹلی جانے کے خواہش مند یہ 12 نوجوان مبینہ طور پر بے رحم انسانی سمگلروں کے ہتھے چڑھ گئے، جن میں سے 7 نوجوانوں کا تعلق لاہور کے سرحدی علاقے بسین گاؤں (جلو موڑ) سے ہے۔ اہل خانہ کے مطابق اسی علاقے کا رہائشی ایجنٹ عامر لاکھوں روپے بٹور کر ان نوجوانوں کو اپنے ساتھ لے گیا تھا، جو ایران پہنچنے تک تو رابطے میں تھے تاہم بعد میں اچانک لاپتہ ہو گئے۔ اب مغوی نوجوانوں کے گلے میں زنجیریں بندھی دل دہلا دینے والی ویڈیوز سامنے آئی ہیں، جن میں وہ رو رو کر اپنی جان بخشی کے لیے رقم کا مطالبہ کر رہے ہیں۔ ایجنٹ نے پہلے فی کس 10 لاکھ روپے وصول کیے اور اب مغویوں پر تشدد کر کے مزید 6,6 ہزار ڈالرز کا مطالبہ کیا جا رہا ہے، جبکہ رقم نہ دینے کی صورت میں جان سے مارنے کی دھمکیاں دی جا رہی ہیں۔ متاثرہ خاندانوں نے حکومت اور ایف آئی اے سے اپیل کی ہے کہ ان کے بچوں کو بحفاظت بازیابی کے لیے فوری اقدامات کیے جائیں