کراچی میں ایف آئی اے کی بڑی کارروائی، انسانی سمگلنگ میں ملوث 7 رکنی گینگ گرفتار

وفاقی تحقیقاتی ادارے (ایف آئی اے) کراچی زون نے شہرِ قائد میں انسانی سمگلنگ کے خلاف ایک بڑی کارروائی کرتے ہوئے 7 رکنی منظم گینگ کو گرفتار کر لیا ہے۔ ایف آئی اے ترجمان کے مطابق ڈائریکٹر کراچی زون کی خصوصی ہدایات پر اینٹی ہیومن ٹریفکنگ سرکل نے نارتھ ناظم آباد میں ایک کرائے کی عمارت پر چھاپہ مارا، جہاں ملزمان نے مختلف ناموں سے جعلی دفاتر قائم کر رکھے تھے۔ یہ گینگ سادہ لوح شہریوں کو یورپ بھجوانے اور بیرون ملک ملازمت کا جھانسہ دے کر فی کس 8 سے 10 لاکھ روپے بٹور رہا تھا۔ چھاپے کے دوران قانون نافذ کرنے والے ادارے نے سیکڑوں پاکستانی پاسپورٹس، جدید اسلحہ، لیپ ٹاپس اور پولیس کی جعلی وردیاں برآمد کر لیں۔

ابتدائی تحقیقات میں یہ چونکا دینے والا انکشاف ہوا ہے کہ جب متاثرہ شہری ویزا نہ ملنے پر اپنی رقم کی واپسی کا مطالبہ کرتے، تو گینگ کے ارکان پولیس کی جعلی وردیاں پہن کر انہیں سنگین نتائج کی دھمکیاں دیتے اور ہراساں کرتے تھے۔ ترجمان کا کہنا ہے کہ یہ نیٹ ورک گزشتہ 5 برسوں سے اس غیر قانونی دھندے اور مالی فراڈ میں ملوث تھا اور اب تک 52 متاثرہ شہری سامنے آ چکے ہیں۔ ایف آئی اے نے کیس کی مزید سنگینی کو دیکھتے ہوئے نیٹ ورک کے دیگر سہولت کاروں کی گرفتاری اور مالی معاملات کی تحقیقات کا دائرہ کار وسیع کر دیا ہے۔