ایف آئی اے امیگریشن کی کراچی ائیرپورٹ پر کارروائی، ملائیشیا جانے والے 23 مسافر آف لوڈ

کراچی: ایف آئی اے امیگریشن نے کراچی ائیرپورٹ پر کارروائی کرتے ہوئے ملائیشیا جانے والے 23 مسافروں کو آف لوڈ کر دیا۔ مسافر پرواز نمبر D7-109 کے ذریعے ملائیشیا روانہ ہو رہے تھے۔

امیگریشن ذرائع کے مطابق تمام مسافر مختلف ایجنٹوں سے رابطے میں تھے اور ملائیشیا پہنچ کر روپوش ہونے کا ارادہ رکھتے تھے۔ ابتدائی تفتیش میں مسافروں نے اعتراف کیا کہ وہ وزٹ ویزا کے پس پردہ ملائیشیا میں ملازمت حاصل کرنے جا رہے تھے۔

ذرائع کا کہنا ہے کہ مسافروں کا تعلق کراچی، لوئر دیر، مردان، سوات، باجوڑ، بنوں، گجرات اور پشاور کے مختلف علاقوں سے ہے۔ امیگریشن پروفائلنگ کے دوران ان کے پاس ناکافی رقم پائی گئی اور وہ وزٹ ویزا کے لیے درکار اخراجات اور مطلوبہ مالی حیثیت ظاہر کرنے میں ناکام رہے۔ مزید یہ کہ مسافروں نے ملائیشیا کے وزٹ ویزے کے حصول کے لیے لازمی بینک اسٹیٹمنٹس بھی جمع نہیں کروائی تھیں۔

تحقیقات کے دوران معلوم ہوا کہ مسافروں کا گروپ محمد اویس نامی ایجنٹ کے ذریعے سفر کر رہا تھا۔ ایجنٹ محمد اویس نے انکشاف کیا کہ ویزوں کا انتظام وسیم خان نامی مسافر نے اسٹیفن نامی ایجنٹ کے ذریعے کروایا تھا، جبکہ ادائیگیاں بینک اکاؤنٹ کے ذریعے کی گئیں۔

ایف آئی اے امیگریشن نے تمام مسافروں کو آف لوڈ کرنے کے بعد مزید تصدیق اور قانونی کارروائی کے لیے ایف آئی اے اینٹی ہیومن ٹریفکنگ سرکل کراچی کے حوالے کر دیا ہے۔