شہر قائد میں افغانیوں کو غیر قانونی قومی شناختی کارڈ بنا کر دینے والا نیٹ ورک پکڑا گیا

کراچی کے علاقے گلستان جوہر میں غیر ملکیوں کو غیر قانونی طور پر پاکستانی شناختی کارڈ (CNIC) بنا کر دینے والے ایک بڑے نیٹ ورک کا انکشاف ہوا ہے۔ ایف آئی اے کاؤنٹر ٹیررازم ونگ نے ایک حساس ادارے کے ساتھ مل کر مشترکہ کارروائی کرتے ہوئے اس نیٹ ورک کو پکڑا ہے اور غیر قانونی طور پر شناختی کارڈ بنوانے اور انہیں پاکستانی خاندانوں کے خاندانی شجرے (فیملی ٹری) میں شامل کرنے والے 2 ایجنٹوں کو گرفتار کر لیا ہے۔ ایف آئی اے ذرائع کے مطابق، اس گروہ نے اب تک 40 سے زائد افغان باشندوں کو غیر قانونی طریقے سے پاکستانی شناختی کارڈ بنا کر دیے ہیں اور ملزمان فی شناختی کارڈ ساڑھے 9 لاکھ روپے رشوت وصول کرتے تھے۔ حکام نے بتایا کہ گرفتار ملزمان کے خلاف مقدمہ درج کر کے اہم دستاویزات تحویل میں لے لی گئی ہیں، جبکہ اس نیٹ ورک کے دیگر کارندوں کی تلاش کے لیے چھاپے مارے جا رہے ہیں جن کے نیٹ ورکس کراچی سمیت لاہور، اسلام آباد، پشاور اور کوئٹہ میں بھی پھیلے ہوئے ہیں۔