وفاقی وزیر خزانہ کی اینٹ انٹرنیشنل اور ایزی پیسہ ڈیجیٹل بینک کے وفد کی ملاقات

اسلام آباد میں وفاقی وزیرِ خزانہ محمد اورنگزیب سے اینٹ انٹرنیشنل اور ایزی پیسہ ڈیجیٹل بینک کے وفد نے ملاقات کی، جس میں پاکستان میں ڈیجیٹل معیشت کے فروغ اور کیش لیس نظام پر تفصیلی تبادلہ خیال کیا گیا۔

وزیرِ خزانہ محمد اورنگزیب نے کہا کہ حکومت ڈیجیٹلائزیشن کے واضح اہداف کے ساتھ آگے بڑھ رہی ہے اور ڈیجیٹل چینلز رسمی معیشت اور ٹیکس نیٹ کو وسعت دینے میں اہم کردار ادا کر سکتے ہیں۔ انہوں نے چھوٹے کسانوں اور کم آمدنی والے طبقے کے لیے ڈیجیٹل قرضوں پر بھی زور دیا اور ایزی پیسہ کو ڈیجیٹل بینک لائسنس ملنے کو اہم پیش رفت قرار دیا۔

سینیٹر محمد اورنگزیب نے کہا کہ ڈیجیٹل بینکس مالی شمولیت میں کلیدی کردار ادا کر سکتے ہیں اور میکرو اکنامک استحکام کے بعد ہدف پائیدار ترقی اور سرمایہ کاری ہے۔ ملاقات میں ورچوئل اثاثوں اور نئی مالی ٹیکنالوجیز پر ضابطہ کاری کی ضرورت پر بھی اتفاق کیا گیا۔

اینٹ گروپ نے پاکستان میں ٹیکنالوجی اور تجربہ منتقل کرنے کے عزم کا اعادہ کیا، جبکہ وفد نے کہا کہ ڈیجیٹل ادائیگیوں کے فروغ سے ٹیکس وصولیوں میں اضافہ ممکن ہے اور کیش لیس پاکستان کے لیے حکومت اور نجی شعبے کے اشتراک کو فروغ دینا ضروری ہے۔