وفاقی ملازمین کے نئے پے سکیلز 2026 کا نوٹیفکیشن جاری

وفاقی حکومت نے سرکاری ملازمین کے لیے نئے ‘پے سکیلز 2026’ کا باضابطہ نوٹیفکیشن جاری کر دیا ہے، جس کے تحت وزارت خزانہ نے 2022 کے پے سکیلز کو نئے سکیلز سے تبدیل کر دیا ہے۔ نوٹیفکیشن کے مطابق گریڈ 1 کے ملازم کی کم از کم بنیادی تنخواہ 13,550 سے بڑھا کر 16,280 روپے کر دی گئی ہے، جبکہ گریڈ 17 کے افسران کی ابتدائی بنیادی تنخواہ 45,070 سے بڑھا کر 54,140 روپے اور گریڈ 22 کی زیادہ سے زیادہ تنخواہ 2,93,350 روپے مقرر کی گئی ہے۔ علاوہ ازیں، تمام گریڈز کے لیے کنوینس الاؤنس میں 50 فیصد کا نمایاں اضافہ کیا گیا ہے، جس کے تحت گریڈ 16 اور اس سے اوپر کے افسران کو اب 7,500 روپے ماہانہ کنوینس الاؤنس ملے گا۔ وزارت خزانہ کے مطابق ان تمام نئے پے سکیلز اور الاؤنسز کا اطلاق یکم جولائی 2026 سے ہو گا۔