ایف بی آر نے مالی سال 2025-26 میں 13 ہزار 601 ارب روپے ٹیکس جمع کر لیا

فیڈرل بورڈ آف ریونیو (ایف بی آر) نے مالی سال 2025-26 کے دوران شاندار کارکردگی کا مظاہرہ کرتے ہوئے نہ صرف اپنا مقررہ ہدف حاصل کر لیا ہے بلکہ مجموعی طور پر 13 ہزار 601 ارب روپے کا ریکارڈ ٹیکس جمع کیا ہے۔

چیئرمین ایف بی آر نے میڈیا سے خصوصی گفتگو کرتے ہوئے تصدیق کی کہ ادارے نے مالی سال کے لیے مقرر کردہ 12 ہزار 983 ارب روپے کا سالانہ ٹیکس ہدف کامیابی سے حاصل کر لیا ہے۔ انہوں نے بتایا کہ اسی عرصے کے دوران ٹیکس دہندگان کو 597 ارب روپے کے ریفنڈز بھی جاری کیے گئے۔  دستاویزات کے مطابق، جولائی 2025 سے جون 2026 تک کے عرصے میں مختلف ٹیکس ہیڈز کے تحت حاصل ہونے والی آمدن درج ذیل رہی. انکم ٹیکس (Direct Taxes): 6 ہزار 645 ارب روپے, سیلز ٹیکس (Sales Tax): 4 ہزار 731 ارب روپے, فیڈرل ایکسائز ڈیوٹی (FED): 840 ارب روپے, (Customs Duty): ایک ہزار 385 ارب روپے.

رپورٹ کے مطابق، گزشتہ مالی سال 2024-25 میں ایف بی آر نے مجموعی طور پر 12 ہزار 237 ارب روپے کا ٹیکس جمع کیا تھا، جس میں سے 493 ارب روپے کے ریفنڈز ادا کیے گئے تھے، اور ریفنڈز کی منہائی کے بعد خالص ٹیکس آمدن 11 ہزار 745 ارب روپے رہی تھی۔ اس لحاظ سے رواں سال ٹیکس وصولی میں نمایاں اضافہ دیکھا گیا ہے۔ سرکاری دستاویزات میں مزید بتایا گیا ہے کہ حکومت کی جانب سے اب نئے مالی سال 2026-27 کے لیے ایف بی آر کو 14 ہزار 264 ارب روپے ٹیکس وصولی کا ایک نیا اور بڑا ہدف سونپا گیا ہے، جسے حاصل کرنے کے لیے سٹرکچرڈ اصلاحات کا سلسلہ جاری رکھا جائے گا۔