کراچی کے حالات موہنجوڈارو سے بھی بدتر ہیں: فاروق ستار

کراچی کونسل آف فارن ریلیشنز کے تحت منعقدہ سیمینار سے خطاب کرتے ہوئے ایم کیو ایم پاکستان کے سینئر رہنما ڈاکٹر فاروق ستار نے کہا ہے کہ کراچی کے حالات اس وقت موہنجوڈارو سے بھی بدتر ہو چکے ہیں اور شہر کے تقریباً 40 ملین (4 کروڑ) افراد شدید مشکلات میں زندگی گزارنے پر مجبور ہیں۔ انہوں نے زور دیا کہ کراچی کی ترقی کے بغیر ملک میں سرمایہ کاری ممکن نہیں، جس کے لیے آئین کے آرٹیکل 140 کے تحت اختیارات کی نچلی سطح تک منتقلی ناگزیر ہے۔ فاروق ستار کا کہنا تھا کہ نئے انتظامی یونٹس کا قیام کراچی کے عوام کی آواز ہے جس سے صوبوں کی جغرافیائی حیثیت تبدیل نہیں ہوگی بلکہ عوامی مسائل ان کی دہلیز پر حل ہوں گے۔ انہوں نے اس مقصد کے لیے ملک گیر عوامی ریفرنڈم کرانے کا مطالبہ بھی کیا۔