فرح گوگی اور شوہر کے خلاف سرکاری زمین فروخت کرنے پر ایک اور مقدمہ درج

گوجرانوالہ: فرح گوگی اور ان کے شوہر احسن جمیل کے خلاف سرکاری زمین فروخت کرنے پر ایک اور مقدمہ درج کرلیا گیا ہے۔ یہ دوسرا مقدمہ دھوکہ دہی کی دفعات کے تحت تھانہ صدر گوجرانوالہ میں درج کیا گیا۔

ایف آئی آر کے مطابق، ملزمان نے پارکس، اسکول اور قبرستان کے لیے مختص اراضی کو فروخت کیا۔ مقدمے میں ن لیگ کے ایم پی اے قیصر اقبال سندھو کو بھی ملزم نامزد کیا گیا ہے۔ مقدمہ جی ڈی اے کے اسٹیٹ آفیسر مرزا بابر کی مدعیت میں درج کیا گیا۔

فرح گوگی اور احسن جمیل کے خلاف ایک روز قبل بھی مقدمہ درج ہوا تھا، جس میں احسن جمیل گجر کے والد، اقبال گجر کو بھی نامزد کیا گیا تھا۔ اقبال گجر ن لیگ کے سینئر رہنما اور سابق صوبائی وزیر ہیں۔