جمہوریت نے عوام کو کچھ نہیں دیا، نظام ری بوٹ کرنا ہوگا: فیصل واوڈ

موجودہ سیاسی و آئینی بحران کے تناظر میں سینیٹر فیصل واوڈا نے موجودہ سیاسی نظام پر شدید تنقید کرتے ہوئے دعویٰ کیا ہے کہ جمہوری نظام نے پاکستانی عوام کو کچھ نہیں دیا اور اب اس نظام کو مکمل طور پر “ری بوٹ” (Reboot) کرنے کی اشد ضرورت ہے۔

ایک نجی ٹی وی کے پروگرام “آن دی فرنٹ” میں گفتگو کرتے ہوئے فیصل واوڈا نے ملک کی سیاسی قیادت، خیبر پختونخوا کی صوبائی حکومت کی کارکردگی اور ملکی معاشی و سیکورٹی صورتحال پر کھل کر بات کی۔ انہوں نے کہا کہ ملک میں جمہوریت کے نام پر بادشاہی طرز کا نظام قائم ہے جس میں غریب عوام مشکلات کا شکار ہیں، جبکہ سیاست دانوں کی نااہلی اور کرپشن کی طویل داستانیں موجود ہیں۔ خیبر پختونخوا کی صورتحال پر تنقید کرتے ہوئے انہوں نے کہا کہ گزشتہ 13 برسوں میں صوبے کے عوام کو کوئی خاطر خواہ فوائد حاصل نہیں ہو سکے۔

سینیٹر فیصل واوڈا نے زور دیا کہ ملک کو بحران سے نکالنے کے لیے نچلی سطح پر نئے اور مخلص لوگوں کو سیاست میں آگے لانا ہوگا، نظام کی بنیادی سطح پر دوبارہ ترتیب کرنی ہوگی اور قومی پرچم و آئین کو تسلیم نہ کرنے والے عناصر کے خلاف سخت ترین قانونی کارروائی کرنا ہوگی۔