پی ٹی آئی لانگ مارچ کی پوزیشن میں نہیں، پہلے ہی کہہ دیا تھا: فیصل کریم کنڈی

گورنر خیبرپختونخوا فیصل کریم کنڈی نے کہا ہے کہ انہوں نے پہلے ہی واضح کر دیا تھا کہ پاکستان تحریک انصاف (پی ٹی آئی) لانگ مارچ کرنے کی پوزیشن میں نہیں ہے، جبکہ آئین میں گورنر راج اور ایمرجنسی کے نفاذ کی تمام شقیں موجود ہیں۔ دنیا نیوز کے پروگرام ’’ٹونائٹ ود ثمر عباس‘‘ میں گفتگو کرتے ہوئے فیصل کریم کنڈی نے الزام عائد کیا کہ پی ٹی آئی قیادت کا تمام تر فوکس صرف اڈیالہ جیل اور ڈی چوک تک محدود ہے جبکہ پورا صوبہ خیبرپختونخوا دہشت گردوں کے رحم و کرم پر چھوڑ دیا گیا ہے۔ انہوں نے دعویٰ کیا کہ پی ٹی آئی کے موجودہ رہنما کبھی نہیں چاہتے کہ بانی پی ٹی آئی عمران خان جیل سے باہر آئیں کیونکہ ان کے باہر آتے ہی موجودہ قیادت کے سیاسی فوائد ختم ہو جائیں گے۔

فیصل کریم کنڈی نے صوبائی حکومت کی سیکیورٹی پالیسی کو شدید تنقید کا نشانہ بناتے ہوئے کہا کہ کے پی کے میں شام کے بعد امن و امان کی صورتِ حال انتہائی خراب ہو جاتی ہے مگر صوبائی حکومت دہشت گردوں کے خلاف کارروائی کرنے کے بجائے ان کی سہولت کاری کر رہی ہے۔ انہوں نے کہا کہ وزیراعظم نے متعدد بار مذاکرات کی دعوت دی لیکن پی ٹی آئی کے اندر چار سے پانچ مختلف دھڑے (فرنچائزز) موجود ہیں جن سے بات چیت ناممکن ہو چکی ہے۔ گورنر کے پی کا کہنا تھا کہ پی ٹی آئی کو احتجاج کے بجائے عدالتوں سے رجوع کرنا چاہیے اور اگر ان کے بانی بے گناہ ہیں تو انہیں قانون کے مطابق ضمانت مل جائے گی۔