دنیا بھر میں میٹا سروس عارضی طور پر متاثر ہونے کے بعد بحال

پاکستان سمیت دنیا بھر میں مقبول ترین سوشل میڈیا پلیٹ فارم فیس بک (میٹا) کی سروسز میں آنے والا اچانک اور عارضی تعطل دور ہونا شروع ہو گیا ہے اور سروسز بڑی حد تک بحال کر دی گئی ہیں۔ اتوار کے روز سروس میں آنے والی اس تکنیکی خرابی کے باعث دنیا بھر میں لاکھوں صارفین کو فیس بک تک رسائی اور اسے استعمال کرنے میں شدید مشکلات کا سامنا کرنا پڑا۔ انٹرنیٹ سروسز کی نگرانی کرنے والی عالمی ویب سائٹ ڈاؤن ڈیٹیکٹر کے مطابق، صبح تقریباً 10 بج کر 39 منٹ پر فیس بک ڈاؤن ہونے کی شکایات میں اچانک تیزی دیکھی گئی اور چند ہی لمحوں میں شکایات کی تعداد 5 سے بڑھ کر 3 ہزار 555 تک جا پہنچی۔

تعطل کے دوران متعدد صارفین نے شکایت کی کہ فیس بک کا ڈیسک ٹاپ ورژن مکمل طور پر کام چھوڑ گیا تھا، جبکہ موبائل ایپ پر لاگ ان کرنے کی کوشش پر صارفین کو یہ پیغام موصول ہو رہا تھا کہ “آپ کا اکاؤنٹ عارضی طور پر دستیاب نہیں ہے، سائٹ کے مسئلے کی وجہ سے اکاؤنٹ فی الحال بند ہے، چند منٹ بعد دوبارہ کوشش کریں۔” تاہم، بعد میں ڈاؤن ڈیٹیکٹر نے تصدیق کی کہ شکایات کی تعداد اب معمول پر آ گئی ہے اور فیس بک کی سروسز کو مکمل طور پر بحال کر دیا گیا ہے، جس کے بعد صارفین اب بلا تعطل اس پلیٹ فارم کا استعمال کر رہے ہیں۔