ڈانس اور ورزش ڈپریشن کے علاج میں مؤثر: نئی تحقیق

ایک تازہ تحقیق میں یہ بات سامنے آئی ہے کہ رقص اور دیگر ورزشیں ڈپریشن کے علاج میں اینٹی ڈپریسنٹس کے برابر مؤثر ثابت ہو سکتی ہیں۔ آسٹریلوی محققین نے بتایا کہ جاگنگ، تیراکی اور ڈانس جیسی ایروبک ورزشیں ڈپریشن اور اینزائٹی کی علامات میں سب سے زیادہ بہتری لاتی ہیں۔

تحقیق کے مطابق ہلکی پھلکی ورزشیں جیسے چہل قدمی بھی ذہنی صحت میں بہتری لانے میں مددگار ثابت ہو سکتی ہیں۔ برٹش جرنل آف اسپورٹس میڈیسن میں شائع تحقیق میں کہا گیا ہے کہ ورزش کو روایتی علاج کے برابر اعتماد کے ساتھ تجویز کیا جانا چاہیے۔

سائنسدانوں نے زور دیا کہ عوامی صحت کی پالیسیوں میں ورزش کو ذہنی صحت کے لیے ابتدائی اور مؤثر علاج کے طور پر شامل کیا جانا چاہیے، خاص طور پر نوجوان بالغ افراد اور زچگی کے بعد خواتین کے لیے۔ برطانیہ میں ہر چھ میں سے ایک شخص ڈپریشن کا شکار ہے، جبکہ خواتین میں اس کی شرح مردوں کے مقابلے میں تقریباً دو گنا زیادہ ہے۔