باجوڑ چیک پوسٹ پر خودکش حملہ کرنیوالا خارجی دہشت گرد بھی افغان شہری نکلا

پاکستان میں دہشت گردی کے حالیہ واقعات میں افغان سرزمین کے استعمال اور افغان شہریوں کے ملوث ہونے کے ناقابلِ تردید شواہد سامنے آگئے ہیں۔ 16 فروری 2026 کو باجوڑ کی ملنگی پوسٹ پر خودکش حملہ کرنے والا دہشت گرد افغان شہری نکلا ہے، جس کی شناخت احمد عرف قاری عبداللہ ابوذر کے نام سے ہوئی ہے۔

سیکیورٹی ذرائع کے مطابق حملہ آور افغانستان کے صوبہ بلخ کا رہائشی اور طالبان کی اسپیشل فورسز کا حصہ بھی رہ چکا ہے۔ اس حملے میں 11 سیکیورٹی اہلکاروں سمیت دو شہری شہید ہوئے تھے۔ رپورٹ کے مطابق، گزشتہ چند ماہ کے دوران ہونے والے بڑے حملوں کے تانے بانے سرحد پار سے ملتے ہیں۔ رواں ماہ اسلام آباد کے علاقے ترلائی، گزشتہ سال پشاور ایف سی ہیڈ کوارٹرز اور اسلام آباد جوڈیشل کمپلیکس پر حملوں میں ملوث دہشت گردوں کا تعلق بھی افغانستان سے تھا۔

ماہرین کا کہنا ہے کہ پاکستان میں دہشت گردی کے 70 فیصد سے زائد واقعات میں افغان شہریوں کا ملوث ہونا افغان طالبان رجیم کی جانب سے دہشت گردوں کی سرپرستی اور محفوظ پناہ گاہوں کی دستیابی کا واضح ثبوت ہے۔ افغانستان سے مسلسل ہونے والی اس سہولت کاری نے خطے میں امن کی کوششوں کو شدید نقصان پہنچایا ہے۔