ایلون مسک کا اے آئی کے ممکنہ خطرات اور حفاظت پر کئی سال پہلے فکرمند ہونے کا انکشاف

ٹیسلا اور سپیس ایکس کے سربراہ ایلون مسک نے انکشاف کیا ہے کہ وہ ایک دہائی سے بھی زائد عرصے سے مصنوعی ذہانت (AI) کے ممکنہ خطرات اور اس کے حفاظتی پہلوؤں کے بارے میں شدید فکرمند رہے ہیں۔ سوشل میڈیا پلیٹ فارم ‘ایکس’ پر ایک پوسٹ کے ذریعے ایلون مسک نے بتایا کہ انہوں نے 2014ء میں شائع ہونے والی معروف مصنف نک بوسٹروم کی کتاب ‘سوپر انٹیلیجنس’ (Superintelligence) کی تیاری میں تعاون کیا تھا، جس پر مصنف نے کتاب کے پیش لفظ میں ان کا خصوصی شکریہ بھی ادا کیا تھا۔ مسک کا کہنا تھا کہ وہ اس کتاب کی اشاعت یعنی 2014ء سے بھی پہلے اے آئی سیفٹی کے خطرات پر غور کر رہے تھے۔

ایلون مسک نے اپنی 12 سال پرانی ایک پوسٹ کا حوالہ دیتے ہوئے یاد دہانی کرائی کہ انہوں نے اس وقت بھی شہریوں کو بوسٹروم کی کتاب پڑھنے کا مشورہ دیا تھا اور انتباہ جاری کیا تھا کہ مصنوعی ذہانت کے معاملے میں انتہائی محتاط رہنے کی ضرورت ہے کیونکہ یہ ٹیکنالوجی ممکنہ طور پر ایٹمی ہتھیاروں سے بھی زیادہ مہلک اور خطرناک ثابت ہو سکتی ہے۔ ایلون مسک کا یہ حالیہ بیان ایسے وقت میں سامنے آیا ہے جب ‘اینتھروپک’ کے سی ای او ڈاریو اموڈی نے بھی جدید اے آئی ماڈلز کی سست رفتار اور زیادہ محفوظ ترقی کے ساتھ ساتھ سخت ترین حفاظتی اقدامات نافذ کرنے کا زور دار مطالبہ کیا ہے۔