آزاد کشمیر کے وزیراعظم کے انتخاب کیلئے شیڈول جاری

آزاد جموں و کشمیر قانون ساز اسمبلی میں نئے وزیراعظم کے انتخاب کے لیے شیڈول جاری کر دیا گیا ہے، جس کے تحت 27 اگست جمعرات کو دوپہر ساڑھے 12 بجے وزیراعظم کا انتخاب عمل میں لایا جائے گا جبکہ نومنتخب وزیراعظم اسی روز شام کو حلف اٹھائیں گے۔ جاری کردہ شیڈول کے مطابق کاغذاتِ نامزدگی جمع کرانے، جانچ پڑتال اور واپسی کے تمام مراحل کے بعد دوپہر 12 بجے حتمی فہرست جاری کی جائے گی۔ قانون ساز اسمبلی میں عددی صورتِ حال کے مطابق مسلم لیگ (ن) کو 32 ارکان کی حمایت حاصل ہے جس کے باعث پارٹی صدر شاہ غلام قادر کی کامیابی کا امکان ظاہر کیا جا رہا ہے، جبکہ پاکستان پیپلز پارٹی کے پاس 14 ووٹ ہیں۔ اس سے قبل 24 اگست کو مسلم لیگ (ن) کے چودھری طارق فاروق 32 ووٹ حاصل کر کے اسپیکر اور احمد رضا قادری بھی 32 ووٹ لے کر ڈپٹی اسپیکر منتخب ہو چکے ہیں۔