یورپ کو اپنے دفاع کی زیادہ ذمہ داری خود سنبھالنا ہوگی، امریکا کا واضح پیغام

امریکی محکمہ دفاع کے اعلیٰ عہدیدار ایلبرج کولبی نے دوٹوک انداز میں واضح کیا ہے کہ بدلتے ہوئے عالمی سکیورٹی حالات کے تناظر میں یورپی ممالک کو اپنے دفاع کی زیادہ ذمہ داری خود سنبھالنا ہوگی۔ انہوں نے اپنے بیان میں بتایا کہ امریکا یورپ میں اپنی فوجی موجودگی، قواعد و ضوابط اور اڈوں کا جامع جائزہ لے رہا ہے تاکہ نیٹو کو نئے تقاضوں کے مطابق ڈھالا جا سکے۔ ایلبرج کولبی کا کہنا تھا کہ یورپ امریکا کے لیے اب بھی انتہائی اہم خطہ ہے، تاہم واشنگٹن چاہتا ہے کہ یورپی اتحادی اپنی سلامتی کے لیے زیادہ مؤثر اور قائدانہ کردار ادا کریں۔ انہوں نے مزید کہا کہ اس پالیسی جائزے کے دوران نیٹو اتحادیوں سے مکمل مشاورت کی جائے گی تاکہ ایک ایسا مضبوط اور پائیدار دفاعی ڈھانچہ تشکیل دیا جا سکے جو موجودہ اور مستقبل کے سکیورٹی چیلنجز کا ڈٹ کر مقابلہ کر سکے۔