عید کا تیسرا روز: قربانی اور دعوتوں کے ساتھ سیرسپاٹوں کا پلان بھی تیار

 مطابق عید کے تیسرے روز بھی مختلف شہروں میں اجتماعی اور انفرادی طور پر جانوروں کی قربانی کی جا رہی ہے۔ جن افراد نے عید کے پہلے اور دوسرے دن ہی اس فریضے سے فراغت حاصل کر لی تھی، وہ اب اپنے عزیز و اقارب، دوستوں سے ملاقاتوں اور مہمانوں کے استقبال میں مصروف ہیں۔

عید الاضحیٰ کے اس آخری روز بھی ملنے ملانے اور دعوتوں کا خصوصی اہتمام دیکھنے میں آ رہا ہے۔ گھروں میں مہمانوں کی خاطر تواضع کے لیے بریانی، کباب، تکہ بوٹی، قورمہ اور مٹن کڑاہی جیسے روایتی اور اشتہا انگیز پکوان تیار کیے جا رہے ہیں۔

ملک میں ایسے لوگوں کی بھی بڑی تعداد موجود ہے جو قربانی کے گوشت کو پیشہ ورانہ ذائقہ دینا چاہتے ہیں۔ اس مقصد کے لیے شہر کے معروف باورچیوں اور کبابیوں کی خدمات پہلے ہی حاصل کر لی گئی ہیں، جہاں باربی کیو اور روایتی پکوانوں کی تیاری عروج پر ہے۔

سنت ابراہیمی کی ادائیگی اور مزیدار کھابوں کے دور کے بعد، اب شہریوں نے تفریح کا رخ کر لیا ہے۔ عید کی چھٹیوں کا بھرپور فائدہ اٹھانے کے لیے بچوں کے ساتھ ساتھ بڑے بھی بڑی تعداد میں پارکوں، ساحلِ سمندر اور دیگر تفریحی مقامات کا رخ کر رہے ہیں، جس کی وجہ سے مختلف شہروں کے پارکوں میں رونقیں اور گہما گہمی دیدنی ہے۔