مصر: ٹرک اور مسافر بس میں خوفناک تصادم، 18 افراد جاں بحق

قاہرہ: مصر میں ایک تیز رفتار ٹرک اور مسافر بس کے درمیان ہونے والے ہولناک تصادم کے نتیجے میں 18 افراد ہلاک اور 3 زخمی ہو گئے ہیں۔ یہ المناک واقعہ اس وقت پیش آیا جب مسافروں سے بھری ایک بس بندرگاہی شہر ‘پورٹ سعید’ کی جانب جا رہی تھی۔

عرب میڈیا کی رپورٹس کے مطابق، حادثے کا شکار ہونے والے زیادہ تر افراد پیشہ ور ماہی گیر تھے، جو روزگار کے سلسلے میں ساحلی بندرگاہ پورٹ سعید کے ایک فش فارم میں کام کرنے کے لیے جا رہے تھے۔ تصادم اتنا شدید تھا کہ بس کو بری طرح نقصان پہنچا، جس کے باعث جانی نقصان میں اضافہ ہوا۔

مصر کے پبلک پراسیکیوٹر نے واقعے کا فوری نوٹس لیتے ہوئے حادثے کی وجوہات جاننے کے لیے باقاعدہ تحقیقات کا حکم دے دیا ہے تاکہ یہ تعین کیا جا سکے کہ حادثہ انسانی غلطی کا نتیجہ تھا یا گاڑیوں میں فنی خرابی کی وجہ سے پیش آیا۔ ریسکیو حکام نے زخمیوں کو قریبی ہسپتال منتقل کر دیا ہے جہاں ان کی حالت تشویشناک بتائی جا رہی ہے۔