الیکشن کمیشن نے پنجاب میں بلدیاتی انتخابات 14 دسمبر کو کرانے کی تجویز دیدی

الیکشن کمیشن آف پاکستان نے حکومتِ پنجاب کو صوبے میں طویل عرصے سے التوا کا شکار بلدیاتی انتخابات 14 دسمبر کو منعقد کرانے کی تجویز دیتے ہوئے انتخابات کا ڈرافٹ شیڈول چیف سیکرٹری پنجاب کو ارسال کر دیا ہے۔ الیکشن کمیشن کی جانب سے تیار کردہ اس مجوزہ پروگرام کے تحت پنجاب میں بلدیاتی نظام کی بحالی کے لیے انتخابی عمل کا باقاعدہ آغاز اکتوبر کے آخری ہفتے سے ہوگا۔

الیکشن کمیشن کے مجوزہ شیڈول کے مطابق امیدوار 27 اکتوبر سے 30 اکتوبر کے درمیان اپنے کاغذاتِ نامزدگی جمع کرا سکیں گے، جن کی جانچ پڑتال کا عمل 2 سے 5 نومبر کے دوران مکمل کیا جائے گا۔ کاغذات کی منظوری یا مسترد ہونے کے خلاف اپیلیں 7 سے 11 نومبر تک دائر کی جا سکیں گی، جبکہ اپیلٹ ٹربیونل 12 سے 16 نومبر کے درمیان ان اپیلوں کا فیصلہ کریں گے۔ کاغذاتِ نامزدگی واپس لینے کی آخری تاریخ 18 نومبر مقرر کی گئی ہے، جس کے بعد 19 نومبر کو امیدواروں کی حتمی فہرستیں آویزاں کی جائیں گی اور 20 نومبر کو انتخابی نشانات الاٹ کیے جائیں گے۔ الیکشن کمیشن کے مطابق 14 دسمبر کو ووٹنگ کا عمل مکمل ہونے کے بعد ریٹرننگ افسران 17 دسمبر تک حتمی نتائج کا باضابطہ اعلان کریں گے۔