بلوچستان کے تین اضلاع میں ضمنی بلدیاتی انتخابات ملتوی

الیکشن کمیشن آف پاکستان نے بلوچستان کے تین حساس اضلاع خضدار، قلات اور حب میں امن و امان کی مجموعی صورتحال اور سیکیورٹی اندیشوں کے پیشِ نظر ضمنی بلدیاتی انتخابات ملتوی کرنے کا بڑا فیصلہ کیا ہے۔

الیکشن کمیشن بلوچستان کے ترجمان کی جانب سے جاری بیان کے مطابق خضدار، قلات اور حب کے اضلاع میں حالات کی بہتری تک پولنگ معطل رہے گی، تاہم ژوب، لورالائی اور سبی اضلاع کی 6 جنرل نشستوں پر ضمنی بلدیاتی انتخابات اپنے مقررہ شیڈول کے مطابق انعقاد پذیر ہوں گے۔ الیکشن کمیشن کا کہنا ہے کہ ان تینوں اضلاع میں پولنگ کے تمام تر انتظامی و سیکیورٹی انتظامات مکمل کر لیے گئے ہیں۔ ان ضمنی انتخابات میں مجموعی طور پر 19 امیدوار میدان میں ہیں، جبکہ رجسٹرڈ ووٹرز کی کل تعداد 5 ہزار 546 ہے، جن میں 2 ہزار 942 مرد اور 2 ہزار 604 خواتین ووٹرز اپنا حقِ رائے دہی استعمال کریں گے۔