ای سی سی اجلاس، ’میراگھرمیراآشیانہ‘ اسکیم میں قرض کی حدایک کروڑتک بڑھانے کی منظوری

اقتصادی رابطہ کمیٹی نے کم لاگت ہاؤسنگ منصوبے ’میراگھرمیراآشیانہ اسکیم‘ میں قرض کی حد ایک کروڑ روپے تک بڑھانے کی منظوری دے دی۔

اقتصادی رابطہ کمیٹی کا اجلاس وفاقی وزیرخزانہ محمد اورنگزیب کی زیرصدارت ہوا۔  جس میں کم لاگت کے گھروں کے لیے یکساں 5 فیصد مارک اپ مقرر کرنے کا فیصلہ کیاگیا۔ اجلاس کے بعد جاری اعلامیے کے مطابق ہاؤسنگ فنانس کےلیے چار سالہ توسیعی اہداف اوراسٹیٹ بینک کے ذریعے اسکیم پر عملدرآمد جاری رکھنے کی منظوری دی گئی۔

ای سی سی نےپہلے سے جاری قرضوں کو بھی 5 فیصد شرح سودپر لانے کا فیصلہ کیا۔ جبکہ اس ضمن میں سبسڈی ادائیگیاں سالانہ مالی گنجائش کے مطابق ہوں گی۔اعلامیے کے مطابق سستے گھروں کی فراہمی سے تعمیراتی شعبے اور روزگار میں اضافہ متوقع ہے

اقتصادی رابطہ کمیٹی کے اجلاس میں بارانی علاقوں میں زرعی پیداوار بڑھانے کے لیے 72 لاکھ 89 ہزار روپے کی تکنیکی ضمنی گرانٹ کی منظوری دی گئی جبکہ تھر کول ریل رابطےکے منصوبے کیلئے 6 ارب 61 کروڑ روپے کی گرانٹ منظورکی گئی۔