ایران: ڈچ سفارتکار اسٹار لنک کی کٹس اور سیٹلائٹ فونز اسمگل کرتے ہوئے پکڑا گیا، روسی میڈیا  

روسی خبر ایجنسی نے دعویٰ کیا ہے کہ ایران میں ایک ڈچ سفارتکار کو اسٹار لنک کی سیٹلائٹ فونز اور کٹس اسمگل کرتے ہوئے پکڑا گیا۔ ویڈیو شواہد کے مطابق تہران ائیرپورٹ پر سفارتکار نے اپنے سوٹ کیس کو اسیکنر سے گزارنے سے انکار کر دیا، جس پر ایرانی حکام نے اس کا سامان ضبط کر لیا۔

سفارتکار بغیر سامان واپس لیے ملک روانہ ہو گیا، تاہم دوسرے مندوب کے سامان کی تاخیر پر ایرانی حکام نے اسے کھول دیا۔

ایلون مسک کی اسٹار لنک سہولت ایران میں انٹرنیٹ کی مفت فراہمی کے لیے استعمال کی جاتی ہے، مگر ایران نے پچھلے سال سے اس کے استعمال، درآمد اور تقسیم پر پابندی لگا رکھی ہے۔ اسٹار لنک کے استعمال کو ممکنہ مجرمانہ عمل یا جاسوسی کے زمرے میں رکھا گیا ہے۔

ہالینڈ کی وزارت خارجہ نے فوری ردعمل دیتے ہوئے تہران ائیرپورٹ پر ڈچ سفارتکار کے سامان کی ضبطی پر شدید احتجاج کیا اور نیدرلینڈز میں تعینات ایرانی سفیر کو طلب کر لیا۔

یہ واقعہ ایران اور ہالینڈ کے درمیان سفارتی تعلقات پر اثر ڈال سکتا ہے اور اسٹار لنک کی قانونی حیثیت ایران میں ایک حساس مسئلہ بن گئی ہے۔