دبئی پولیس نے بچے کے سڑک پر بائیک چلانے پر 50 ہزار درہم جرمانہ عائد کر دیا

دبئی: دبئی پولیس نے ایک بچے کو سڑک پر بائیک چلانے پر 50 ہزار درہم (تقریباً 38 لاکھ پاکستانی روپے) کا جرمانہ عائد کر دیا۔ خلیجی اخبار کے مطابق دبئی ٹریفک پولیس نے پیٹرولنگ کے دوران دو بچوں کو مین روڈ پر چار پہیوں والی کواڈ بائیک چلاتے دیکھا اور فوری طور پر انہیں روک لیا۔

پولیس نے والدین کو طلب کیا اور بائیک ضبط کر لی۔ حکام نے والدین کو خبردار کیا کہ وہ اپنے کم عمر بچوں کو سڑکوں پر بائیک یا کسی بھی گاڑی چلانے کی اجازت نہ دیں کیونکہ یہ اقدام نہ صرف بچوں بلکہ دیگر شہریوں کے لیے بھی سنگین خطرہ پیدا کر سکتا ہے۔

دبئی پولیس نے واضح کیا کہ جو کوئی بھی بچوں یا شہریوں کی حفاظت کو خطرے میں ڈالے گا، اس کے خلاف سخت قانونی کارروائی کی جائے گی۔