سمندری طوفان کی پیشگوئی، دبئی پولیس نے ساحلی علاقوں میں الرٹ جاری کر دیا

سمندری طوفان کی پیشگوئی کے بعد دبئی پولیس نے عوام کو سمندری خطرات سے محفوظ رہنے کے لیے احتیاطی تدابیر اختیار کرنے کی ہدایت جاری کر دی ہے۔

دبئی پولیس کے مطابق غیر مستحکم موسمی صورتحال کے پیشِ نظر حفاظتی اقدامات مزید سخت کر دیے گئے ہیں اور شہریوں سے کہا گیا ہے کہ خراب موسم کے دوران سمندر میں جانے سے گریز کریں۔

پولیس نے مختلف عوامی بیچز پر نفری تعینات کر دی ہے اور شہریوں کو سمندر میں کھیل کود اور تیراکی سے باز رہنے کی ہدایت کی گئی ہے۔ اس کے علاوہ سمندری طوفان سے نمٹنے کے لیے پیشگی تیاریاں مکمل کر لی گئی ہیں اور صورتحال پر مسلسل نظر رکھی جا رہی ہے۔

دبئی پولیس کے مطابق ساحلی علاقوں میں اضافی گشت شروع کر دیا گیا ہے جبکہ عوام کو واضح ہدایات دی گئی ہیں کہ وہ حفاظتی تدابیر پر عمل کریں اور سمندر میں داخل نہ ہوں۔

پولیس کا کہنا ہے کہ تمام ساحلی علاقوں کی نگرانی کے لیے خصوصی ٹیمیں تعینات کی گئی ہیں، جبکہ کسی بھی ہنگامی صورتحال میں شہری فوری طور پر 999 پر رابطہ کریں۔