متحدہ عرب امارات میں طوفانی بارشیں ، فلائٹ آپریشن متاثر

متحدہ عرب امارات میں طوفانی بارشوں اور خراب موسمی حالات کے باعث معمولاتِ زندگی متاثر ہو رہے ہیں، جبکہ فضائی آپریشن پر بھی اثرات مرتب ہونے لگے ہیں۔

دبئی بین الاقوامی ہوائی اڈہ کی انتظامیہ نے مسافروں کے لیے اہم ہدایات جاری کرتے ہوئے کہا ہے کہ خراب موسم کے باعث سفر کے لیے اضافی وقت رکھا جائے۔

انتظامیہ کے مطابق شدید بارش اور نامساعد موسمی صورتحال کے باعث پروازوں کے شیڈول میں تاخیر کا خدشہ ہے، اس لیے مسافر ہوائی اڈے روانگی سے قبل اپنی متعلقہ ایئرلائن سے رابطہ کریں اور اپنی پرواز کی تازہ ترین صورتحال ضرور معلوم کریں۔

حکام نے مزید کہا کہ مسافر براہِ راست اپنی ایئرلائن سے معلومات حاصل کریں تاکہ کسی بھی ممکنہ پریشانی سے بچا جا سکے اور سفر کو بہتر انداز میں ممکن بنایا جا سکے۔