سینئر صحافی مطیع اللہ جان کے خلاف منشیات و دہشت گردی کیس

سینئر صحافی مطیع اللہ جان کے خلاف منشیات اور دہشت گردی کے مقدمے میں منشیات کے الزامات ختم کرنے سے متعلق درخواست پر سماعت مکمل ہونے کے بعد عدالت نے فیصلہ محفوظ کر لیا۔ کیس کی سماعت ایڈیشنل سیشن جج طاہر عباس سپرا نے کی۔

دورانِ سماعت مطیع اللہ جان اپنے وکیل بیرسٹر میاں علی اشفاق اور ایڈوکیٹ احد کھوکھر کے ہمراہ عدالت میں پیش ہوئے۔ بیرسٹر میاں علی اشفاق نے عدالت سے استدعا کی کہ منشیات کے الزام میں مطیع اللہ جان کو کیس سے ڈسچارج کیا جائے اور اس حوالے سے دفعہ 265-ڈی پڑھ کر سنائی۔

سماعت کے دوران سرکاری وکیل نے مطیع اللہ جان سے منشیات کے چارجز ختم کرنے کی درخواست کی مخالفت کی۔ بیرسٹر میاں علی اشفاق نے دلائل دیتے ہوئے کہا کہ منشیات کی مبینہ ریکوری میں نہ کوئی پرائیویٹ گواہ شامل ہے اور نہ ہی کسی قسم کی ویڈیو ریکارڈنگ موجود ہے، جو کیس کو مشکوک بناتی ہے۔

دلائل کے دوران بیرسٹر میاں علی اشفاق کی جانب سے ماضی کے سپریم کورٹ کے حوالے سے “ڈوگر کورٹ” کا لفظ استعمال کیے جانے پر عدالت نے انہیں ایسے الفاظ کے استعمال سے روک دیا۔ عدالت نے استفسار کیا کہ کیا منشیات کے کیسز میں ویڈیو ریکارڈنگ ضروری ہے اور اگر نہیں تو اس کے قانونی اثرات کیا ہوں گے۔

بیرسٹر میاں علی اشفاق نے مؤقف اختیار کیا کہ مطیع اللہ جان ایک سینئر اور مستند صحافی ہیں، جبکہ اس کیس میں صحافی کورٹ رپورٹر ثاقب بشیر کا بیانِ حلفی بھی ریکارڈ پر موجود ہے۔ اس پر عدالت نے ریمارکس دیے کہ وہ منشیات کے چارجز کی حد تک دلائل کو سراہتی ہے، تاہم درخواست کی استدعا اس سے مطابقت نہیں رکھتی۔

پراسیکیوٹر نے دلائل دیتے ہوئے کہا کہ عدالت اپنے 17 اکتوبر کے آرڈر میں منشیات کے الزامات پر بادی النظر میں رائے دے چکی ہے۔ جج طاہر عباس سپرا نے پراسیکیوٹر سے مکالمہ کرتے ہوئے کہا کہ اس وقت چارج فریم کرنے کی اسٹیج نہیں آئی تھی۔ عدالت نے ویڈیو ریکارڈنگ نہ ہونے پر بھی سوال اٹھایا، جس پر پراسیکیوٹر نے جواب دیا کہ ویڈیو کیوں نہیں بنائی گئی، اس کا جواب وہ نہیں دے سکتے، تاہم یہ معاملہ ٹرائل کے دوران گواہوں سے پوچھا جا سکتا ہے۔

فریقین کے تفصیلی دلائل سننے کے بعد عدالت نے منشیات کے چارجز ختم کرنے کی درخواست پر فیصلہ محفوظ کر لیا۔