امریکی صدر کی چینی ہم منصب سے 24 ستمبر کو واشنگٹن میں اہم ملاقات طے

امریکی صدر ڈونلڈ ٹرمپ اور چینی صدر شی جن پنگ کے درمیان 24 ستمبر کو واشنگٹن میں ایک اہم سربراہی ملاقات طے پائی ہے۔ ملاقات میں دونوں بڑی معیشتوں کے درمیان جاری تجارتی جنگ بندی میں توسیع، دوطرفہ تجارت، تائیوان کی صورتحال، مصنوعی ذہانت (AI) کی ٹیکنالوجی اور ایران کے بحران پر تفصیلی بات چیت متوقع ہے۔ خبر رساں ادارے رائٹرز کے مطابق، سفارتی ذرائع اس ملاقات سے کسی تاریخی یا بڑے معاہدے کی توقع کے بجائے موجودہ تجارتی کشیدگی کومزید بڑھنے سے روکنے اور دونوں ممالک کے تعلقات میں استحکام لانے کو اہم پیشرفت قرار دے رہے ہیں۔

تجزیہ کاروں کا کہنا ہے کہ چند ماہ قبل دونوں رہنماؤں کی پہلی ملاقات کے بعد چین کی عالمی تجارت اور معاشی پیشرفت میں نمایاں اضافہ ہوا ہے، جبکہ اس کے برعکس صدر ڈونلڈ ٹرمپ کو اندرونِ ملک گرتی ہوئی عوامی مقبولیت اور معاشی دباؤ کا سامنا ہے۔ رپورٹ کے مطابق، ٹرمپ ایران کے ساتھ بڑھتے ہوئے اور مہنگے عسکری تنازع میں الجھے ہوئے ہیں جس سے نہ صرف ان کی سیاسی مقبولیت متاثر ہوئی ہے بلکہ امریکی عوام پر مالی اخراجات کا بوجھ بھی بڑھا ہے۔ طاقت کے اس بدلتے ہوئے توازن نے سربراہی ملاقات سے وابستہ توقعات کو محتاط کر دیا ہے کیونکہ صدر شی جن پنگ واشنگٹن کو فوری طور پر کسی بڑی رعایت دینے کے موڈ میں دکھائی نہیں دیتے۔