ٹرمپ نے سوشل میڈیا پر نان اسٹاپ اے آئی تصاویر اور ویڈیوز پوسٹ کر ڈالیں

امریکی صدر ڈونلڈ ٹرمپ نے اپنے سوشل میڈیا پلیٹ فارم ‘ٹروتھ سوشل’ (Truth Social) پر مصنوعی ذہانت (AI) کی مدد سے تیار کردہ تصاویر اور ویڈیوز کی نان اسٹاپ بوچھاڑ کر کے ایک نیا تنازع کھڑا کر دیا ہے۔ صدر ٹرمپ کی جانب سے شیئر کی گئی ان عجیب و غریب پوسٹس میں انہیں کہیں جنگجو کی طرح گھوڑے پر سوار دکھایا گیا ہے، تو کہیں وہ نیو میکسیکو کا نام بدل کر ‘نیو امریکہ’ رکھنے کی تجاویز دیتے نظر آئے۔ ایک تصویر میں وہ جدید روبوٹس کے ساتھ مارچ کرتے دکھائی دیے اور خود کو تاریخ کا عظیم ترین امریکی صدر قرار دیا۔ مزید برآں، انہوں نے ایک پوسٹ میں “چاند ہمارا ہے” کا دعویٰ کیا جبکہ ایک اور اے آئی تصویر کے ساتھ “آبنائے ہرمز ہماری ہے” کا عنوان چسپاں کرتے ہوئے ایران کو ایک ناکام ریاست (Failed State) قرار دیا۔

اس تناظر میں وائٹ ہاؤس کے سرکاری اکاؤنٹس نے بھی صدر ٹرمپ کی ایک خاص اے آئی ویڈیو شیئر کی ہے جس میں وہ سبز رنگ کی انگوٹھی اور میچنگ سبز ٹائی پہنے ایک منفرد انداز میں نظر آ رہے ہیں۔ امریکی صدر کی جانب سے سوشل میڈیا پر اس مسلسل اور بلا تعطل پوسٹنگ کو اپوزیشن جماعت ڈیموکریٹک پارٹی اور مبصرین کی جانب سے شدید تنقید کا نشانہ بنایا جا رہا ہے۔ ڈیموکریٹک سوشل میڈیا انفلوئنسر ہیری سِسن نے ٹرمپ کی ان سرگرمیوں پر سخت ردِعمل دیتے ہوئے طنزاً کہا کہ امریکی صدر کو آن لائن “نفسیاتی دورہ” پڑا ہے اور ان کا یہ رویہ ایک ذمہ دار عالمی رہنما کے شایانِ شان نہیں۔