روس میں طاعون کے ممکنہ کیس کا بغور جائزہ لے رہے ہیں: امریکی صدر

امریکی صدر ڈونلڈ ٹرمپ نے اعلان کیا ہے کہ امریکا روس میں سائبیریا کے مقام پر سامنے آنے والے طاعون (Pneumonic Plague) کے ممکنہ کیس کا بغور جائزہ لے رہا ہے اور ضرورت پڑنے پر ماسکو کی ہر ممکن طبی اور سائنسی مدد کے لیے مکمل طور پر تیار ہے۔ وائٹ ہاؤس میں صحافیوں سے گفتگو کرتے ہوئے صدر ٹرمپ نے کہا کہ واشنگٹن کو روس میں ممکنہ نمونیائی طاعون کے واقعے اور پیش آنے والے خطرات کی اطلاع حال ہی میں موصول ہوئی ہے، جس پر امریکی ادارے کڑی نظر رکھے ہوئے ہیں۔

صدر ٹرمپ کا مزید کہنا تھا کہ حیاتیاتی اور انسانی صحت سے جڑے اس قسم کے خطرناک واقعات پر عالمی تعاون ضروری ہے، اور امریکا اس بحران سے نمٹنے کے لیے روسی حکام کو ہر ممکن سپورٹ اور امداد فراہم کرے گا۔ یہ بیان سائبیریا کی لیبارٹری میں خاتون محقق کی پراسرار ہلاکت اور 200 سے زائد افراد کے قرنطینہ کیے جانے کی رپورٹس کے بعد سامنے آیا ہے، جس پر بین الاقوامی برادری میں تشویش پائی جا رہی ہے۔