روس، یوکرین جنگ دنیا کیلئے تباہ کن، فوری خاتمہ ضروری ہے: ٹرمپ

امریکی صدر ڈونلڈ ٹرمپ نے روس اور یوکرین کے درمیان جاری جنگ کو فوری ختم کرنے پر زور دیتے ہوئے کہا ہے کہ اس تنازع کے باعث روس اپنی ڈیزل آئل انڈسٹری پر کنٹرول کھو چکا ہے۔ اپنے سوشل میڈیا پلیٹ فارم ‘ٹروتھ سوشل’ پر جاری ایک بیان میں ڈونلڈ ٹرمپ نے انکشاف کیا کہ یوکرینی حملوں کے نتیجے میں روس کی متعدد ڈیزل ریفائنریز تباہ ہو چکی ہیں اور کم از کم عارضی طور پر بند ہیں۔ انہوں نے کہا کہ اس بے مقصد اور نہ ختم ہونے والی جنگ سے پوری دنیا متاثر ہو رہی ہے اور ہر ماہ تقریباً 25 ہزار افراد، جن میں اکثریت فوجیوں کی ہے، اپنی جانیں گنوا رہے ہیں۔ ٹرمپ کا کہنا تھا کہ ریفائنریز پر حملوں سے عالمی سطح پر ڈیزل کی سپلائی اور قیمتیں شدید متاثر ہو رہی ہیں۔

دوسری جانب، ڈونلڈ ٹرمپ نے وائٹ ہاؤس میں میڈیا کی رسائی پر حالیہ پابندیوں کے تنازع پر اپنے موقف کی وضاحت کرتے ہوئے کہا کہ ان کی انتظامیہ آزاد صحافت کے خلاف نہیں ہے بلکہ وہ ‘فیک نیوز’ (جعلی خبروں) کے خلاف کارروائی کر رہی ہے۔ امریکی صدر نے دعویٰ کیا کہ امریکا میں جعلی خبریں کینسر کی طرح پھیل چکی ہیں جو اب قومی سلامتی کے لیے ایک بڑا خطرہ بن گئی ہیں، اس لیے جعلی خبروں اور گمراہ کن معلومات کا یہ سلسلہ فوری طور پر روکنا ہوگا۔