امریکا ایران کے خلاف جنگ سے جلد نکل سکتا ہے: ڈونلڈ ٹرمپ

امریکی صدر ڈونلڈ ٹرمپ نے ریاست کنساس میں ایک بڑی انتخابی ریلی سے خطاب کرتے ہوئے دعویٰ کیا ہے کہ امریکا ایران کے خلاف جاری عسکری کارروائیوں سے جلد نکل سکتا ہے، تاہم ایران کو کسی صورت جوہری ہتھیار حاصل کرنے کی اجازت نہیں دی جائے گی۔

صدر ٹرمپ کا کہنا تھا کہ امریکی اور اتحادی فورسز کی جانب سے کی جانے والی شدید بمباری کے نتیجے میں ایران کی فوجی صلاحیت اور مرکزی قیادت کو ناقبلِ تلافی نقصان پہنچایا جا چکا ہے۔ ان کے مطابق ایران کی بحریہ، فضائیہ، ریڈار سسٹم اور فضائی دفاعی نظام (Air Defence) مکمل طور پر تباہ ہو چکے ہیں جبکہ 229 ایرانی لڑاکا طیارے رن ویز پر ہی تباہ کر دیے گئے ہیں۔ انہوں نے مزید دعویٰ کیا کہ ایرانی کی پہلی اور دوسری صف کی قیادت ختم ہو چکی ہے اور موجودہ قیادت نے ضمانت مانگی ہے کہ انہیں سابقہ رہنماؤں کی طرح ہدف نہ بنایا جائے۔

خطاب کے دوران امریکی صدر نے یورپی ممالک پر شدید تنقید کرتے ہوئے کہا کہ ایران کے معاملے پر امریکا نے یورپ سے مدد مانگ کر ان کا امتحان لیا تھا، لیکن یورپی ممالک امریکا کے ساتھ کھڑے نہیں ہوئے جن کا یہ رویہ وہ کبھی نہیں بھولیں گے۔ ٹرمپ نے تنبیہ کی کہ اگر یورپی ممالک نے اپنی پالیسیوں پر نظرثانی نہ کی اور اپنی سرحدیں بند نہ کیں تو امریکا کو یورپ سے نکلنا پڑے گا۔