ایران نے 48 گھنٹے میں آبنائے ہرمز مکمل نہ کھولی تو سخت کارروائی ہوگی: ٹرمپ

واشنگٹن: امریکی صدر ڈونلڈ ٹرمپ نے ایران کے خلاف جارحانہ تیور برقرار رکھتے ہوئے اعلان کیا ہے کہ وہ تہران کے ساتھ کسی بھی قسم کے معاہدے کے خواہاں نہیں ہیں۔ سوشل میڈیا پلیٹ فارم ‘ٹروتھ سوشل’ پر جاری اپنے بیان میں صدر ٹرمپ نے دعویٰ کیا ہے کہ ایران کی عسکری قیادت ختم اور بحری و فضائی قوت تباہ ہو چکی ہے، جس کے باعث اب ایران کے پاس کوئی مؤثر دفاع باقی نہیں رہا۔

صدر ٹرمپ نے ایران کو 48 گھنٹے کی الٹی میٹم دیتے ہوئے کہا ہے کہ اگر مقررہ وقت میں ‘آبنائے ہرمز’ کو مکمل طور پر نہ کھولا گیا تو امریکہ ایران کے پاور پلانٹس کو نشانہ بنانا شروع کر دے گا۔ انہوں نے واضح کیا کہ اس کارروائی کا آغاز ایران کے سب سے بڑے پاور پلانٹ کی تباہی سے کیا جائے گا۔ امریکی صدر کا مزید کہنا تھا کہ امریکہ ایران کے خلاف جنگ میں اپنے مقررہ شیڈول سے کئی ہفتے آگے ہے، تاہم انہوں نے اس کی مزید تفصیلات فراہم نہیں کیں۔

دوسری جانب، ایرانی حکام نے امریکی اور اسرائیلی حملوں کے بعد کسی بھی قسم کے مذاکرات کی پیشکش کو دو ٹوک انداز میں مسترد کر دیا ہے۔ یاد رہے کہ اس سے قبل دونوں فریقین کے درمیان پسِ پردہ بات چیت کے اشارے ملے تھے، مگر حالیہ بیان بازی اور حملوں کے بعد خطے میں کشیدگی ایک بار پھر انتہا پر پہنچ گئی ہے اور عالمی منڈی میں توانائی کی ترسیل کے حوالے سے تشویش پیدا ہو گئی ہے۔