ایران ڈیل چاہتا ہے لیکن بولنے سے ڈر رہا، دنیا میں 8 جنگیں رکوائیں، ایک جنگ جیت رہے ہیں: ٹرمپ

واشنگٹن: امریکی صدر ڈونلڈ ٹرمپ نے ریپبلکن پارٹی کے کنونشن سے خطاب کرتے ہوئے ایران کے حوالے سے انتہائی سخت اور جارحانہ موقف اختیار کیا ہے۔ صدر ٹرمپ کا دعویٰ ہے کہ ایرانی قیادت امریکہ کے ساتھ معاہدہ (Deal) کرنے کی شدید خواہش رکھتی ہے، لیکن وہ اپنے عوام اور اندرونی و بیرونی نتائج کے خوف سے اس کا اظہار کرنے سے ڈر رہے ہیں۔ انہوں نے کہا کہ ایرانی رہنماؤں کو خدشہ ہے کہ معاہدہ نہ کرنے کی صورت میں کہیں وہ ہماری کارروائیوں کا نشانہ نہ بن جائیں۔

صدر ٹرمپ نے ایران کے خلاف حالیہ عسکری کارروائیوں کی تفصیلات بتاتے ہوئے دعویٰ کیا کہ امریکی بی ٹو (B-2) بمبار طیاروں نے ایرانی جوہری تنصیبات، بحریہ اور فضائیہ کو مکمل طور پر تباہ کر دیا ہے اور امریکہ ایران میں اس جنگ کو مکمل کرنے کے قریب ہے۔ انہوں نے سابق صدر اوباما پر تنقید کرتے ہوئے کہا کہ ان کی پالیسیوں نے ایران کے لیے جوہری ہتھیاروں کا حصول ممکن بنایا تھا، لیکن وہ اس مقصد میں کبھی کامیاب نہیں ہوں گے۔

اپنی کامیابیوں کا ذکر کرتے ہوئے ڈونلڈ ٹرمپ نے کہا کہ انہوں نے دنیا بھر میں 8 مختلف جنگیں رکوائی ہیں اور اب ایک بڑی جنگ جیت رہے ہیں۔ انہوں نے میڈیا کو ‘فیک نیوز’ قرار دیتے ہوئے الزام لگایا کہ ان کے خلاف 94 فیصد جھوٹی خبریں چلائی گئیں تاکہ یہ تاثر دیا جا سکے کہ وہ جنگ ہار رہے ہیں، لیکن اس کے باوجود وہ الیکشن جیتنے میں کامیاب رہے۔