میل اِن ووٹنگ کا نظام بدعنوانی اور بے قابو مسائل کا شکار ہے: ٹرمپ

امریکی صدر ڈونلڈ ٹرمپ نے سپریم کورٹ کے متعدد اہم فیصلوں کو شدید تنقید کا نشانہ بناتے ہوئے الزام عائد کیا ہے کہ ملک میں میل اِن ووٹنگ (ڈاک کے ذریعے ووٹنگ) کا نظام بدعنوانی اور بے قابو دھاندلی کا شکار ہو چکا ہے۔ اپنے سوشل میڈیا پلیٹ فارم ‘ٹروتھ سوشل’ پر جاری ایک سخت بیان میں ڈونلڈ ٹرمپ نے موقف اختیار کیا کہ میل اِن بیلٹس کے ذریعے بائیں بازو کی ڈیموکریٹک پارٹی کے لیے دھاندلی کرنا انتہائی آسان ہو گیا ہے، اور سپریم کورٹ کے ایک فیصلے سے ریپبلکنز سمیت پورے امریکہ کو بھاری سیاسی نقصان پہنچا ہے۔

ڈونلڈ ٹرمپ نے عدالتی فیصلوں پر شدید برہم ہوتے ہوئے دعویٰ کیا کہ اعلیٰ عدلیہ کے بعض فیصلوں نے امریکہ کو کم از کم 100 سال پیچھے دھکیل دیا ہے اور سپریم کورٹ نے قوم کو شدید مایوس کیا ہے۔ انہوں نے کہا کہ جسٹس ایلیٹو اور جسٹس تھامس جیسے ججوں نے بھی ان متنازع فیصلوں سے سخت اختلاف کیا تھا۔ صدر ٹرمپ نے ٹیرف سے متعلق عدالتی فیصلے پر بھی تنقید کی اور کہا کہ اس سے امریکی معیشت کو کھربوں ڈالر کا نقصان ہو گا، جبکہ برتھ رائٹ سٹیزن شپ (پیدائشی حقِ شہریت) سے متعلق فیصلے سے بھی ملک میں بڑے پیمانے پر بدعنوانی نے جنم لیا۔

امریکی صدر نے مزید سنگین الزامات عائد کرتے ہوئے کہا کہ سپریم کورٹ کے کچھ ججز ریڈیکل ڈیموکریٹس کے سیاسی دباؤ کا شکار ہو چکے ہیں، جس کے باعث عدالت نے ایسے تباہ کن فیصلے دیے جن سے ہونے والا نقصان ناقابلِ تلافی ہے۔ اپنے بیان کے اختتام پر ڈونلڈ ٹرمپ نے خبردار کیا کہ موجودہ سپریم کورٹ کو امریکی تاریخ کے چند تباہ کن ترین اور غلط ترین فیصلوں کے حوالے سے ہمیشہ یاد رکھا جائے گا۔