امریکی صدر اپنے سیاسی کیریئر میں مقبولیت کی کم ترین سطح پر آگئے

امریکی صدر ڈونلڈ ٹرمپ کی عوامی مقبولیت اپنے سیاسی کیریئر کی کم ترین سطح 32 فیصد پر آ گئی ہے. ‘رائٹرز اور اپسوس’ (Reuters/Ipsos) کے چار روزہ تازہ ترین سروے کے مطابق صرف ایک ہفتے کے دوران صدر ٹرمپ کی مقبولیت 35 فیصد سے گر کر 32 فیصد رہ گئی ہے. خود ان کی اپنی جماعت کے حامیوں میں بھی عدم اطمینان بڑھا ہے، جہاں ریپبلکن ووٹرز میں ان کی حمایت کی شرح 82 فیصد سے کم ہو کر 73 فیصد پر آ گئی ہے. سروے کے مطابق صرف 17 فیصد امریکیوں نے مہنگائی اور زندگی کے اخراجات پر قابو پانے کے لیے ٹرمپ انتظامیہ کے اقدامات کی حمایت کی ہے.

تجزیہ کاروں کے مطابق روزمرہ اخراجات اور افراطِ زر امریکی عوام کے لیے سب سے بڑا مسئلہ بن چکے ہیں، جو آنے والے 3 نومبر کے وسط مدتی (مڈ ٹرم) انتخابات کے نتائج پر گہرے اثرات مرتب کر سکتے ہیں۔ رپورٹ میں بتایا گیا ہے کہ ایران کے ساتھ جنگ اور ایندھن (پٹرول و ڈیزل) کی قیمتوں میں زبردست اضافے نے عوام اور بالخصوص ریپبلکن ووٹرز کی تشویش میں اضافہ کیا ہے، جس کے باعث پہلی بار 51 فیصد ریپبلکنز نے مہنگائی سے نمٹنے کے صدارتی طریقہ کار کو مسترد کر دیا ہے۔ جنوری 2025 میں حلف برداری کے وقت 47 فیصد مقبولیت رکھنے والے صدر ٹرمپ کا یہ حالیہ گراف کانگریس میں ریپبلکن پارٹی کی معمولی اکثریت کے لیے بڑا خطرہ بن چکا ہے۔