معذور امریکی فوجی و پاکستانی نژاد شہری محمد زاہد چوہدری وفاقی جج کے حکم پر آئی سی ای حراست سے رہا

ٹیکوما میں ایک وفاقی جج نے پیر کے روز پاکستانی نژاد معذور امریکی فوجی محمد زاہد چوہدری کی فوری رہائی کا حکم دے دیا، جو گزشتہ چار ماہ سے نارتھ ویسٹ آئی سی ای پروسیسنگ سینٹر میں زیرِ حراست تھے۔

چیف یو ایس ڈسٹرکٹ جج ڈیوڈ جی ایسٹیوڈیلو نے قرار دیا کہ محمد زاہد چوہدری کی حراست قانونی طریقۂ کار کے بغیر عمل میں لائی گئی، جو غیر قانونی ہے۔ عدالت کے مطابق جب تک انہیں تحریری نوٹس اور جواب دینے کا موقع نہ دیا جائے، انہیں دوبارہ حراست میں نہیں لیا جا سکتا۔

محمد زاہد چوہدری کو 21 اگست کو ٹکویلا میں شہریت انٹرویو کے بعد آئی سی ای نے حراست میں لیا تھا۔ دورانِ حراست طبی سہولیات کی عدم فراہمی کے باعث ان کی صحت شدید متاثر ہوئی، جس پر عدالت نے تشویش کا اظہار بھی کیا۔

چوہدری کو پیر کی شام ان کی اہلیہ میلیسا چوہدری کے ہمراہ گھر روانہ کر دیا گیا۔ رہائی کے بعد اپنے بیان میں انہوں نے کہا کہ یہ انصاف کی جیت ہے، تاہم ایک معذور اور اعزاز یافتہ امریکی فوجی کے ساتھ ایسا ہونا افسوسناک ہے۔

واضح رہے کہ نائنتھ سرکٹ کورٹ آف اپیلز نے 2020 میں چوہدری کی بے دخلی پر حکمِ امتناع جاری کر رکھا ہے، جو تاحال برقرار ہے، اسی بنیاد پر عدالت نے کہا کہ انہیں حراست میں رکھنے کا کوئی جواز نہیں تھا۔
محمد زاہد چوہدری کے شہریت کیس کا حتمی فیصلہ اپیلٹ کورٹ میں زیرِ سماعت ہے۔