ڈی آئی خان: درازندہ چیک پوسٹ دھماکے میں شہید 3 اہلکاروں کی نماز جنازہ ادا

ڈیرہ اسماعیل خان (ڈی آئی خان) کے علاقے درا زندہ کی چیک پوسٹ پر ہونے والے ہولناک خودکش دھماکے میں جامِ شہادت نوش کرنے والے مزید 3 شہداء کی نمازِ جنازہ ڈی آئی خان کی پولیس لائنز میں سرکاری اعزاز کے ساتھ ادا کر دی گئی ہے۔ نمازِ جنازہ ادا کیے جانے والے شہداء میں کسٹمز ڈیپارٹمنٹ کے حوالدار فرمان، سپاہی اسامہ اور ریسکیو 1122 کے اہلکار شریف اللہ شامل ہیں۔ اس موقع پر سول و عسکری اعلیٰ حکام، پولیس، کسٹمز اور ریسکیو 1122 کے افسران سمیت شہداء کے لواحقین نے بڑی تعداد میں شرکت کی۔

نمازِ جنازہ کی ادائیگی کے بعد پولیس کے چاق و چوبند دستے نے شہداء کے جسدِ خاکی کو مکمل سرکاری اعزاز کے ساتھ سلامی پیش کی، جس کے بعد تینوں شہداء کی میتوں کو تدفین کے لیے ان کے آبائی علاقوں کی جانب روانہ کر دیا گیا۔ واضح رہے کہ درا زندہ کے علاقے میں قائم چیک پوسٹ پر ہونے والے مبینہ خودکش دھماکے کے نتیجے میں مجموعی طور پر 12 افراد شہید جبکہ 35 سے زائد زخمی ہوئے تھے۔