ٹانک میں نامعلوم افراد کی فائرنگ سے ڈی جی الیکشن کمیشن شمشاد خان شہید

خیبرپختونخوا کے ضلع ٹانک میں دہشت گردی کا ایک اور بزدلانہ اور افسوسناک واقعہ پیش آیا ہے جہاں نامعلوم مسلح افراد نے فائرنگ کر کے الیکشن کمیشن آف پاکستان کے ڈائریکٹر جنرل (ڈی جی) شمشاد خان کو شہید کر دیا ہے۔ ترجمان الیکشن کمیشن کے جاری کردہ بیان کے مطابق یہ واقعہ خالصتاً ٹارگٹ کلنگ کا شاخسانہ ہے اور شہید افسر کی کسی کے ساتھ بھی کوئی ذاتی یا خاندانی دشمنی موجود نہیں تھی۔

ترجمان الیکشن کمیشن نے شہید شمشاد خان کی خدمات کو خراجِ تحسین پیش کرتے ہوئے کہا کہ وہ ایک انتہائی دیانت دار، شریف النفس اور فرض شناس افسر تھے۔ چیف الیکشن کمشنر، سیکرٹری الیکشن کمیشن اور ادارے کے تمام ملازمین نے اس دلخراش واقعے پر گہرے دکھ اور غم و غصے کا اظہار کیا ہے۔ الیکشن کمیشن آف پاکستان نے وفاقی اور صوبائی حکومتوں سمیت قانون نافذ کرنے والے اداروں سے پرزور مطالبہ کیا ہے کہ ملک بھر میں سرکاری ملازمین کو دہشت گردی اور ٹارگٹ کلنگ کے واقعات سے فوری اور موثر تحفظ فراہم کیا جائے اور اس حملے کے ذمہ داروں کو کیفَر کردار تک پہنچایا جائے۔