نائب وزیراعظم اسحاق ڈار کی زیرِ صدارت آئی ٹی برآمدات سے متعلق اہم اجلاس

اسلام آباد: نائب وزیراعظم و وزیرِ خارجہ اسحاق ڈار کی زیرِ صدارت آئی ٹی برآمدات کے فروغ سے متعلق ایک اہم اجلاس منعقد ہوا، جس میں آئی ٹی برآمدات کے ذریعے آمدن اور زرمبادلہ بڑھانے کے مختلف پہلوؤں پر غور کیا گیا۔

اجلاس کے دوران وزارتِ آئی ٹی کی جانب سے عالمی سطح پر آئی ٹی برآمدات میں اضافے سے متعلق تفصیلی بریفنگ دی گئی۔ بریفنگ میں آئی ٹی سیکٹر کی موجودہ صورتحال، برآمدی مواقع اور مستقبل کی حکمتِ عملی پر روشنی ڈالی گئی۔

اس موقع پر اسحاق ڈار نے آئی ٹی کو مستقبل کی صنعت قرار دیتے ہوئے کہا کہ آئی ٹی اور متعلقہ شعبے قومی معیشت کا کلیدی ستون بن سکتے ہیں۔ انہوں نے اس شعبے کی استعداد سے بھرپور فائدہ اٹھانے اور نوجوانوں کو جدید ٹیکنالوجی سے جوڑنے کی ضرورت پر زور دیا۔اجلاس میں وزارتِ خارجہ نے آئی ٹی انڈسٹری کے فروغ کے لیے عالمی سطح پر بھرپور کردار جاری رکھنے کے عزم کا اظہار کیا۔اجلاس میں وفاقی وزیرِ آئی ٹی، سیکریٹری خارجہ اور دیگر سینئر حکام نے شرکت کی۔