نائب وزیراعظم و وزیر خارجہ اسحاق ڈار کا چین کا دورہ، پاک چین اسٹریٹجک ڈائیلاگ کا ساتواں دور منعقد

چینی وزیر خارجہ وانگ ای کی دعوت پر نائب وزیراعظم و وزیر خارجہ اسحاق ڈار نے بیجنگ کا سرکاری دورہ کیا، جہاں دونوں رہنماؤں کی مشترکہ صدارت میں پاک–چین وزرائے خارجہ اسٹریٹجک ڈائیلاگ کا ساتواں دور منعقد ہوا۔

دفتر خارجہ کے مطابق مذاکرات کے دوران پاک–چین تعلقات کے تمام پہلوؤں کا جامع جائزہ لیا گیا، جبکہ علاقائی اور عالمی امور پر تفصیلی تبادلۂ خیال کیا گیا۔ بات چیت میں چین پاکستان اقتصادی راہداری (سی پیک)، دوطرفہ تجارت، کثیرالجہتی تعاون اور عوامی روابط کے فروغ پر خصوصی توجہ دی گئی۔

ملاقات کے دوران اسحاق ڈار اور وانگ ای نے پاک–چین ہمہ موسمی اسٹریٹجک شراکت داری کی اہمیت پر زور دیتے ہوئے کہا کہ دونوں ممالک کے درمیان مضبوط دوستی خطے میں امن، استحکام اور خوشحالی کے لیے ناگزیر ہے۔

دونوں وزرائے خارجہ نے دوطرفہ اور کثیرالجہتی فورمز پر قریبی رابطہ اور تعاون کو مزید مستحکم بنانے پر بھی اتفاق کیا۔ اس موقع پر پاکستان اور چین کے درمیان سفارتی تعلقات کی 75ویں سالگرہ کو شایانِ شان انداز میں منانے کے عزم کا اعادہ کیا گیا۔

دفتر خارجہ کے مطابق پاکستان–چین دوستی نہ صرف دونوں ممالک بلکہ پورے خطے کے روشن اور مستحکم مستقبل کی ضامن ہے۔