اسحاق ڈار سے ڈاکٹر عبدالمالک کی ملاقات، بلوچستان کی معاشی خوشحالی کے عزم کا اعادہ

نائب وزیراعظم اور وزیر خارجہ سینیٹر اسحاق ڈار سے نیشنل پارٹی کے وفد نے ایک اہم ملاقات کی ہے، جس میں بلوچستان کی معاشی خوشحالی اور صوبے کو درپیش مسائل کے حل کے لیے وفاقی حکومت کے پختہ عزم کا اعادہ کیا گیا۔ ملاقات کے دوران نائب وزیراعظم اسحاق ڈار نے زور دیا کہ بلوچستان کے عوام کے مسائل کا خاتمہ اور ان کا معاشی استحکام وفاقی حکومت کی اولین ترجیحات میں شامل ہے۔ اس موقع پر نیشنل پارٹی کے صدر اور سابق وزیراعلیٰ بلوچستان ڈاکٹر عبدالمالک بلوچ نے صوبے میں امن و امان کے قیام کے لیے دہشت گردی کے خلاف جاری آپریشن کی بھرپور حمایت کا اعلان کیا اور بلوچستان کے عوام کی ترقی و خوشحالی کے لیے اپنی پارٹی کے مکمل تعاون کا یقین دلایا۔ اس اہم مشاورتی ملاقات میں وزیراعظم کے مشیر رانا ثناء اللہ اور طارق باجوہ بھی موجود تھے۔