ڈینور ہوائی اڈے پر افسوسناک واقعہ، رن وے پر موجود شخص مسافر طیارے سے ٹکرا کر ہلاک

امریکا کے ڈینور ہوائی اڈے پر ایک خوفناک حادثے میں مسافر طیارہ ٹیک آف کے دوران رن وے پر موجود ایک شخص سے ٹکرا گیا، جس کے نتیجے میں وہ موقع پر ہلاک ہوگیا جبکہ طیارے کے انجن میں آگ بھی بھڑک اٹھی۔

ہوائی اڈے کے حکام کے مطابق فرنٹیئر ایئرلائن کی پرواز 4345 جمعے کی رات تقریباً 11 بج کر 19 منٹ پر روانگی کے لیے رن وے پر دوڑ رہی تھی کہ اسی دوران ایک شخص طیارے کی زد میں آگیا۔

امریکی ذرائع ابلاغ کے مطابق متاثرہ شخص جزوی طور پر طیارے کے انجن میں بھی چلا گیا تھا، جس کے باعث انجن میں آگ لگ گئی۔ واقعے کے فوراً بعد امدادی ٹیمیں حرکت میں آئیں اور آگ پر قابو پالیا گیا۔

برطانوی ذرائع ابلاغ کے مطابق ابتدائی تحقیقات میں معلوم ہوا ہے کہ ہلاک ہونے والا شخص ہوائی اڈے کے اطراف نصب حفاظتی باڑ عبور کرکے اندر داخل ہوا تھا۔ حکام کا کہنا ہے کہ باڑ پار کرنے کے تقریباً دو منٹ بعد ہی وہ رن وے پر پہنچ گیا جہاں حادثہ پیش آیا۔

ایئرلائن انتظامیہ کے مطابق طیارہ لاس اینجلس جا رہا تھا اور اس میں 224 مسافر جبکہ عملے کے 7 افراد سوار تھے۔ حادثے کے دوران کم از کم ایک مسافر معمولی زخمی بھی ہوا۔

واقعے کے بعد ہوائی اڈے کی سیکیورٹی اور حفاظتی انتظامات پر سوالات اٹھائے جا رہے ہیں جبکہ حکام نے مکمل تحقیقات شروع کر دی ہیں۔