وزیراعظم شہباز شریف سے سویڈش ٹیلی کمیونیکیشن کمپنی ایرکسن کے وفد کی ملاقات

سلام آباد: وزیراعظم محمد شہباز شریف سے آج وزیراعظم ہاؤس میں معروف سویڈش ٹیلی کمیونیکیشن کمپنی ایرکسن کے وفد نے ملاقات کی۔ وفد کی قیادت ایرکسن کے صدر اور مارکیٹ ایریا یورپ، مشرق وسطیٰ و افریقہ کے سربراہ مسٹر پیٹرک جوہانسن کر رہے تھے۔

وزیراعظم نے وفد کا خیرمقدم کرتے ہوئے پاکستان میں ایرکسن کی چھ دہائیوں پر محیط سرمایہ کاری اور ٹیلی کمیونیکیشن سیکٹر کی ترقی میں اس کے کردار کو سراہا۔ ملاقات میں اقتصادی ترقی، پیداواری صلاحیت اور عوامی خدمات کی فراہمی کے لیے جدید ڈیجیٹل رابطوں کی اہمیت پر تبادلہ خیال کیا گیا۔

وزیراعظم نے 5G سمیت جدید نیٹ ورکس میں ایرکسن کے عالمی تجربے سے استفادہ حاصل کرنے میں پاکستان کی دلچسپی کا اظہار کرتے ہوئے قومی ضروریات کے مطابق محفوظ اور پائیدار آئی ٹی انفراسٹرکچر کی ترقی کے عزم کا اعادہ کیا۔

ملاقات میں ڈیجیٹل مہارتوں کی ترقی، مالی شمولیت، کیش لیس ادائیگی نظام کی توسیع اور قدرتی آفات سے نمٹنے کے لیے ٹیکنالوجی کے مؤثر استعمال پر بھی گفتگو ہوئی۔

ایرکسن کے وفد نے 5G سپیکٹرم نیلامی اور آئی ٹی انفراسٹرکچر کی بہتری کے لیے حکومت پاکستان کی کوششوں کو سراہا۔

ملاقات میں نائب وزیراعظم و وزیر خارجہ اسحاق ڈار، وزیر آئی ٹی شزہ فاطمہ خواجہ، معاون خصوصی سید طارق فاطمی اور اعلیٰ حکام بھی موجود تھے۔