پاکستان اور افغانستان کے درمیان استنبول مذاکرات میں ڈیڈلاک

استنبول میں پاکستان اور افغانستان کے درمیان ہونے والے مذاکرات کسی نتیجے پر نہ پہنچ سکے۔ وزیرِ اطلاعات عطاء اللہ تارڑ کے مطابق مذاکرات میں ڈیڈلاک برقرار رہا۔

وزیرِ اطلاعات نے بتایا کہ پاکستان نے مذاکرات میں ثالثی پر ترکیہ اور قطر کا شکریہ ادا کیا۔ عطاء اللہ تارڑ نے کہا کہ پاکستان اپنے اصولی مؤقف پر قائم ہے کہ افغانستان کی سرزمین سے ہونے والی دہشت گردی پر قابو پانے کی ذمہ داری افغان حکومت پر عائد ہوتی ہے۔ان کا کہنا تھا کہ افغان طالبان دوحہ امن معاہدے 2021 کے تحت اپنے بین الاقوامی، علاقائی اور دوطرفہ وعدوں کی تکمیل میں اب تک ناکام رہے ہیں۔عطاء اللہ تارڑ نے واضح کیا کہ پاکستان افغان عوام کے ساتھ خیر سگالی کا جذبہ رکھتا ہے اور ان کے لیے ایک پرامن مستقبل کا خواہاں ہے۔ تاہم پاکستان طالبان حکومت کے ایسے اقدامات کی حمایت نہیں کرے گا جو افغان عوام یا پڑوسی ممالک کے مفاد میں نہ ہوں۔وزیرِ اطلاعات نے کہا کہ پاکستان اپنی عوام اور خودمختاری کے تحفظ کے لیے تمام ضروری اقدامات جاری رکھے گا۔