اسحاق ڈار کی برسلز میں اہم سفارتی سرگرمیاں، ای یو اور نیٹو قیادت سے ملاقاتیں

نائب وزیراعظم و وزیرِ خارجہ اسحاق ڈار کے دورۂ برسلز میں سفارتی رابطوں کا سلسلہ تیزی سے جاری ہے، جہاں انہوں نے یورپی یونین کے کمشنر برائے داخلی امور میگنس برنر اور نیٹو کے سیکرٹری جنرل مارک روٹے سے علیحدہ علیحدہ ملاقاتیں کیں۔

نیٹو ہیڈکوارٹرز آمد پر مارک روٹے نے اسحاق ڈار کا استقبال کیا۔ ملاقات میں خطے کی مجموعی صورتحال، عالمی و علاقائی سیکیورٹی اور پاکستان۔نیٹو تعاون کو مزید مضبوط بنانے کے پہلوؤں پر تفصیلی گفتگو ہوئی۔ اس موقع پر اسحاق ڈار نے عالمی سطح پر سفارتکاری، مذاکرات اور بین الاقوامی معاہدوں کی پاسداری کی اہمیت پر زور دیتے ہوئے کہا کہ پاکستان خطے میں امن، استحکام اور خوشحالی کے فروغ کیلئے اپنا مثبت کردار جاری رکھے گا۔

اسحاق ڈار کی یورپی یونین کے کمشنر برائے داخلی امور میگنس برنر کے ساتھ ملاقات بھی اہم رہی، جس میں پاکستان سے ہنرمند افرادی قوت کی یورپی یونین تک قانونی رسائی آسان بنانے پر غور کیا گیا۔ دونوں فریقین نے پاک۔ای یو مائیگریشن موبلٹی ڈائیلاگ کے نتائج پر اطمینان کا اظہار کیا اور کہا کہ مزدوروں کی قانونی نقل و حرکت اور متعلقہ چیلنجز سے نمٹنے کے لیے مشترکہ تعاون مزید بڑھایا جائے گا۔