کسٹمز انفورسمنٹ کی بڑی کارروائیاں، 1 ارب 38 کروڑ روپے مالیت کی منشیات و اسمگل شدہ سامان ضبط

 پاکستان کسٹمز انفورسمنٹ نے ملک گیر اسمگلنگ کے خلاف جاری اپنی مہم کے دوران کوئٹہ میں دو بڑی کامیاب کارروائیاں کرتے ہوئے مجموعی طور پر ایک ارب 38 کروڑ روپے مالیت کی منشیات، اسمگل شدہ سامان اور گاڑیاں ضبط کر لی ہیں۔

فیڈرل بورڈ آف ریونیو (ایف بی آر) کی جانب سے جاری کردہ اعلامیے کے مطابق، کسٹمز انفورسمنٹ کوئٹہ نے یہ دونوں اہم کارروائیاں کیں۔ ضبط کیے گئے سامان کی تفصیلی فہرست میں 22 اعشاریہ 14 کلو گرام منشیات، غیر ملکی سگریٹ، چھالیہ، بھارتی ادویات، آٹو پارٹس، ایک قیمتی گاڑی اور تین اسمگلنگ میں استعمال ہونے والے ٹرک شامل ہیں۔

ایف بی آر کے اعلامیے میں بتایا گیا ہے کہ پہلی کارروائی زیارت کراس کے مقام پر کی گئی، جہاں پنجاب اور خیبرپختونخوا کی جانب منتقل کیے جانے والے تین مشکوک کنٹینرز کو روکا گیا۔ ان کنٹینرز کی تلاشی پر اسمگل شدہ سامان کی بڑی مقدار برآمد ہوئی۔

دوسری کامیاب کارروائی میں کسٹمز انفورسمنٹ کوئٹہ نے ایک گاڑی کو روک کر تلاشی لی، جس کے نچلے حصے میں بنے ہوئے اسپیئر وہیل کے اندر انتہائی مہارت سے چھپائی گئی منشیات برآمد ہوئی۔ برآمد ہونے والی منشیات کی بین الاقوامی مارکیٹ میں تخمینی مالیت ایک ارب 23 کروڑ روپے بنتی ہے۔

کسٹمز حکام نے تمام ضبط شدہ منشیات، اسمگل شدہ سامان اور گاڑیوں کو تحویل میں لے کر ذمہ دار عناصر کے خلاف مزید قانونی کارروائی کا آغاز کر دیا ہے۔